|
|
投注六合彩人士感受的中獎機率比真實的高
六合彩數月前，每注價格由五元大幅提高至十元，於是我把我其中一樣最喜愛的娛樂活動 ──買六合彩 ── 放下一邊。
無錯，我覺得用五元可以買到一個希望，實在非常化算，很相宜。有研究調查顯示，每位買了彩票的人士，都自覺中獎的機會比其他人為高！咁又真係，若果覺得唔會中，又真係唔會買啦。買既人，梗係覺得會中先買嘛！用五蚊雞，就可以令自己開心（發夢）一下，認真超值。
中六合彩頭獎的機會率計算法(小學生都會明)
之但係咁，作為受過些少統計學教育既《經數學人》，應該用番少少科學既角度去睇下中六合彩既機會率。
中六合彩既機會率，其實非常簡單，假設你只買一注，單式6個字，買既號碼仲要同電影「富貴迫人」入便既驃叔叔係發夢（發住夢都要買六合彩）買左既一樣，買左123456六個字。然後你睇住六合彩既攪珠直播 ─── 第一個攪出既號碼係 ─── The first drawn number is ─── 好啦，係呢一刻你手上果張有六個號碼既飛，係仲有四十九個波既好先進既電動式攪珠機入便，會有一個波跌出黎。而你，就有 6／49 既機會中到第一個開出黎既號碼。
假設第一個開出的正正是「1號」，中左。跟住個好先進既電動式攪珠機又再攪動既時候，機入便只剩下四十八個波，而你手上張飛，亦只剩下五個仲有機會會中既號碼（因原先的六個號碼已經中左一個「1號」，不會再開）。即係你中完第一個號碼，要再中第二個號碼的機會便是 5／48，如此類推。
相關文章：[趣味IQ題][考起考試局] 正四面體加正方錐體，等於幾多面體？公開試題都出錯
咁，連續中第一個號碼及再中第二個號碼的機會率又要怎樣計算呢？同你擲銀仔(公字)要連續擲到兩次公一樣，要將兩個機會率乘埋（1/2 x 1/2 = 1/4）。要乘埋的原因是，你首先要做到第一樣機會不大的事，之後，再係呢個機會不大的事件前提下，再發生多一次機會不大的事件。
用生日Party切蛋糕作比喻，你將一個生日蛋糕，切成兩等份（一半機會），再係其中的半份蛋糕上，再切開兩等份（再一半），咁係咪切開左一件 1/4 (½ × ½)大既蛋糕呀？
咁即是說，六合彩若要買一注而中到頭獎的機會便會是：
6/49 × 5/48 × 4/47 × 3/46 × 2/45 × 1/44 = 1/13,983,816 （接近一千四百萬分之一）
如你有 HKEAA Approved 既計數機，你可以撳 49 [nCr] 6 [EXE] 就計到分母 13,983,816。
〔呢種計法叫 Combination (組合)，係呢篇六合彩中的統計學（續）我會詳細講解點用〕
六合彩屬「不公平搏奕 (Unfair Game)」
若一賭局的彩金等於其機會率分數的倒數（Reciprocal, 把分子分母顛倒），則屬「公平搏奕 (Fair Game)」。如你估另一人擲公字，彩金為一賠二，其為你估中機會率的倒數，所以是一「公平搏奕」。
相關文章：各種數學及符號表情SYMBOL 大合集(千多個) 以後唔洗再四圍搵
相反，如果你去「過大海」同何生鍊過咁，實聽輸多贏少。買大細唔係「公平搏奕」黎架，因為有圍骰通殺㗎。用「公平搏奕」概念去買六合彩，若五蚊一注時，則應該等到金多寶有 5 x 13,983,816 = $69,919,080 才去買（假設沒有其他二三獎或它們的彩金少得微不足道，仲要冇人同你一齊中）。
但是，六合彩仍賣五蚊時彩金七千萬已跟本不多見，現在賣十蚊更加要有 10 x 13,983,816 = $139,838,160 才是「公平搏奕」（冇計算到二三獎等），我睇六合彩彩金都幾難再次去到一億。。。（按：2012年9月22日又有1億彩金啦）
咁點買六合彩先「抵d」？
請看下篇－－六合彩中的統計學（續）－ 胆拖點買？中左點計？
|
|
发表于 2024-8-12 23:27:00
发表于 2024-8-20 21:55:07
